KHAWTHLIR

Armed Veng hming
Aizawl Municipal Corporation commissioner Zothanmawia chuan nimin khan hriattirna chhuahin, Armed Veng Veng hming chu Armed Veng tia ziah tur a nih thu leh Armed veng North tia ziah loh tur a nih thu a tarlang.

MNYF-in sorkar An chhuang
MNF ṭhalai office bearer-te nimina Mizo Hnam Rûna ṭhukhawm chuan resolution an siam a, "Chief minister Pu Zoramthanga kaihhruai sorkarna hnuaia minister leh MLA-te'n ram tana hna an thawhnaah hmingchhiatna nei loa ram tana theihtawp chhuaha hma an la thei zel hi kan chhuang tak zet. Kumin fûrpui kal mekah sorkarin theihtawpa hma a lak avangin ei leh bar lak luhna kawngah harsatna kan tâwk lutuk lo hi lawmawm kan ti hle," an ti. December 8, 2022-ah Mizoram pum huap MNYF Workers Meet neih an tum thu a tarlang bawk.

Saitual SP-in kâwm
Saitual SP thar J Lalmuankima chuan nimin khan a pisaah Saitual khawpuia VC member-te leh MJA member-te a kâwm. SP chuan, an district rálmuanna atan theihtawp chhuah a tum thu sawiin, "Khawtlang hruaitute leh mipui nena thawhhona ṭha a pawimawh. Police kan indaih loh avangin awmze neia hma kan lak zel theih nan khawtlang mipuite'n nasa taka min ṭanpui a ngai dawn a ni," a ti. Inkawmnaah hian financial crime, cyber crime, POCSO Act, MV Act leh thil dangte an sawiho a ni.

Pawisa chawitir
The Mizoram (Containment & Prevention of the Spread of Covid-19) Act, 2020 hnuaiah July 3-9, 2022 chhung khan Siaha district-ah mi pasarih leh Khawzawl district-ah pakhat hrem an ni a, an pawisa chawi tling khawm chu Rs 800 a ni. July 3-9 chhung hian district dang zawngah chuan The Mizoram (Containment & Prevention of the Spread of Covid-19) Act, 2020 hnuaiah hrem an awm lo.