KHAWTHLIR

June 27 khan Mizoram UPC ṭhalai, PYD chuan Aizawl Civil Hospital-ah thisen unit 264 an pe a, a petute mipa 200 leh hmeichhia 64 an ni. Lei­tan South Branch KṬP-in Synod Hospital-ah thisen unit 33 pein, petute mipa 27 hmeichhia paruk an ni a; Lawngtlai Bazar Unit ṬKP-in District Hospital tan unit 15 pein, petute mipa pariat leh hmeichhia pasarih an ni. Siahaa Centenary Corps SAY-te'n Siaha District Hospital-ah thisen unit 6 an pe bawk.

Tun hnaia lirnghing kaihhnawihah Aizawl South-I bialtu MLA C Lalsawivunga chuan June 26-27 khan East Tuipui bial khaw hrang hrang a tlawh a, pawisa, silpauline leh first aid hman­ruate a hlân. C Lalsawivunga hian Khawbung, Zawlsei, Khuangthing, Dungtlang, Samthang, Farkawn leh Vaphai khuate a tlawh a ni.

Serchhip DC Dr Lalzirmawia Chhangte chuan, Inrinni khan an district-a NH-54 zauh hna Kram Infracon Pvt. Ltd.-te'n an thawh dan a enfiah a, theihtawp chhuaha chak zawka hma la zel turin a chah. Kram Infracon hian Baktawng aṭanga Keiṭum inkar kawng laih zau leh siam hna an thawk dawn a; an thawh tur chin hi km. 50.93-a thui a ni a, formation cutting (laih zauh hna) bik kilometre 7 an zo tawh a ni.

Lunglei DC V Lalsang­liana chuan, Mizoram sorkarin June 26, 2020-a order a chhuah chu Aizawl Municipal Corporation (AMC) atan bik deuha duan a nih ber thu a tarlang a, "Lunglei district-ah chuan June 22, 2020-a District Task Force-in a rèl tawh kha hman chhunzawm tur a ni," a ti. 

Lunglei HPC vice chairman Lawmawma Tochhawng, MLA chuan Inrinni zing khan a bial chhung, Lunglei Ramthar Venga inkalpawhna kawng RCC paving a hawng. Kawng hi ft. 321-a sei leh ft. 10-a zau a ni a, cheng nuai sarih chuang sénga siam a ni.

Aizawl West-III bialtu MLA VL Zaithanzama chuan tunlai hian a bial chhung veng hrang hrang­ah Covid-19 avang­a mi tam takin harsatna an tawk tih hriain, local task force kaltlangin inhlawhna a siamsak.