Minister-in mamawhte Shillong-ah a buaipui
Minister Dr R Lalthangliana chuan July 9, 2022 zan khan Shillong-a North East Centre for Technology Application and Reach (NECTAR), National Medical Commission (NMC) leh North Eastern Indira Gandhi Regional Institute of Health and Medical Sciences (NEIGRIHMS) hotute a kâwm a, Mizoram mamawhte a sawipui.
Dr R Lalthangliana chuan, NECTAR hotute chu NECTAR scheme hrang hrang kaltlanga Mizoram tana hmalak theih dan tur a sawipui a ni. NECTAR hotute chuan, Mizoram nen ṭang dunin a ṭul anga hmalak an inhuam thu an sawi.
NECTAR hi sorkar laipuia Science & Technology department hnuaia awm, autonomous society a ni a, Shillong-ah headquarters a nei. India hmarchhak state-te tana din niin, tunlai thiamna hmanga hmasawnna kawng sial an buaipui a; agro & food processing (ei leh in tur sawngbawlna), renewable energy, mau, geo spatial, employment & livelihood leh communication lamah an inthlûrbing a ni.
R Lalthangliana hian NMC leh NEIGRIHMS hotute pawh a kâwm a; Zoram Medical College tihhmasawn leh tihchangtlun dan turte a sawipui bawk.
Guwahati-ah YMCA North East India Region (YMCA-NEIR) president Dr R Lalthangliana hian July 10, Pathianni khan hruaitu dangte nen Assam chief minister Dr Himanta Biswa Sarma chu a chenna inah an hmu a, YMCA-NEIR tan Guwahati-ah ram pe turin an ngen a ni.