Mipui sorkar siam turin chak takin ZPM a ṭhang mek - Rev. K Thanzauva

ZPM party vice president Rev.Dr K Thanzauva chuan, ZPM chu harsatna nasa tak karah kalphung thar, mipui sorkar siam turin chak takin a ṭhang mek a, ZPM avangin beiseina a neih thu a sawi.

Nimina ZPM pisaa inkhawmah thu sawiin K Thanzauva chuan, "Hmasawnna kal mek te, kohhran ropui tak te, khawtlang nun mawi tak te, mimal hlawhtlingte chanchin ngaihnawm tak takte avang hian beiseina ka nei. Mizoram political history-ah a vawi khatna atan ZPM hi harsatna nasa tak karah kalphung thar, mipui sorkar siam turin chak takin a ṭhang mek a, he ZPM avang hian beiseina ka nei a ni," a ti.

Rev. Dr K Thanzauva chuan, "Pulpit leh poli­tical platform aṭanga au aw kan hriat fo chu, Mizoram chu ngawlvei tamna, HIV/AIDS vei tamna, corruption tamna, cancer tamna, kutdawh state tih a ni fo. Hetiang a ni chung hian kei chuan beiseina ka la nei fan a ni," a ti a; KMMTTP Sittwe-Zorinpui, Tlabung-Rangamati-Chittagong sumdawnna turte ngaih­tuahin, Mizoram chu India hmarchhaka sumdawnna hmunpui a la ni ngei dawna a hriat thu leh chu'ngte avang chuan beiseina a neih thu a sawi bawk.