A pangngai anga hna lâk a theih veleh SEDP teacher hi a tàwp ang - Thangmawia
MNF party chuan nimin khan Mizo Hnam Runah inkhawm an hmang a, thu sawitu MNF adviser L Thangmawia, MLA chuan, zirtirtu a pangngai anga lâk a theih hunah SEDP hnuaia zirtirtu lâkte chu an tàwp dawn thu a sawi.
Human Resource Development Board vice chairman L Thangmawia chuan, MNF sorkar tirhah khaw 400-ah tal zirtirtu quarters awm se tia rêl a nih thu sawiin, "Central-ah dil vek a ni tawh a, Covid vangin file a mu rih," a ti a; tun hnaiah primary school leh middle school-ah indaih loh zualpuiah SEDP teacher 771 rawih thar an ni tih sawiin, "Hna pangngai anga lâk a theih veleh SEDP teacher hi a tàwp leh ang," a ti bawk.
L Thangmawia chuan, Mizoramah political party tam tak a ding tawh tih sawiin, "A ṭhen chu a tàwp leh tawh. Heng zingah hian Mizo hnam tana din chu MNF chiah a ni a, Mizo hnam tan, Pathian hming lama din a ni," a ti.
Chief Minister leh minister-te chu eptu party-te'n sawiselna tur an hre lo nia sawiin Thangmawia chuan, "An thawk ṭha em em a, sêlna tur an zawng chawp mai mai a ni," a ti a; MNF sorkarah ni 100 inhlawhna, gas, buhfai leh ei leh in lak luh thilah pangngai takin a kal reng theih thu leh sorkar duhkhawp lohna tam tak awm theite chu Covid-19 vang niin a sawi.
L Thangmawia chuan, eptu party-te chhungkaw buaina thlirin, inthlan ni thut se an buai hle tur thu a sawi a, "MNF chu kan inpeih reng. Chung lamin kan ram hi hun harsa min pe a, kan elpui turte insingsak ngaiin an awm thung. Tuna opposition party buai dan chu MNF sorkar leh theih nana chung lam remruat a ni," a ti.