Kolasib district-a bank CD ratio 68.69%

Kolasib District Consultative Committee/ District Level Review Committee chu an chiarman John LT Sanga, district bawrhsap hoin nimin khan DC conference hall-ah an ṭhukhawm a, kumin May-June inkara bank-te credit deposit ratio (CD Ratio) chu 68.69% a nih thu tarlan a ni.

John LT Sanga chuan, DCC/ DLRC member-te chu Kolasib district mipui eizawnna leh khawsak dinhmun chawi kànnaa dihmun pawimawh tak chelhtu an nih thu a sawi a, "Bank kaltlanga sorkarin mipui hamṭhatna a ruahman ṭhinte hi a chhawrtu tur mipui hnen a thlen ngei theih nan zirtirna leh inhrilhfiahnate uar zawka kalpui a pawimawh," a ti.

Ṭhutkhawmah hian, India Post Payments Bank emaw business corres­pondent kal­tlanga bank la dawr thei lo khaw ṭhenkhat zinga Dilzau leh Seṭhawn khua tan ruahmanna a awm tawh thu an sawi a; ranvulh, sangha khawi leh loneih lama hma la duh, loan mamawhte chu a changtu department leh bank hotute nen enhoa awlsam zawka loan an hmuh theih dan tur an sawiho bakah, self help group-te'n an mamawh ang loan an hmuh theih nan a changtu department leh bank hotute'n thawh­hona ṭha zawk an neih a pawimawh thute an sawi.

Bank venhimna lama police nena thawhhona kalpui dan leh Potential Linked Credit Plan, 2023-24 chungchang an sawiho bawk.