Sorkar dan hman mek zinga 24 chu Siamṭhat turin chhawp chhuak
Mizoram State Law Commission chu nimin khan an chairman John Siamkunga, MLA hoin a pisaah an ṭhukhawm a; Mizoram sorkarin dan a hman mek zingah nuaibo ngai eng emaw zat leh siamṭhat ngai 24 a awm thu tarlan a ni.
Meeting-ah hian Mizoramin kum 1972-a Assembly a neih aṭanga dan siam hrang hrangte en a ni a; dan eng emaw zat chu a changtu department hnenah nuaibo (repeal) turin rawtna siam a ni. Dan 24 chu siamṭhat ngai a awma an hriat avangin, a changtu department-te hma la turin an hriattir dawn bawk.
Meeting-a tarlan danin, Law Commission hian affidavit hman khawloh chungchangah hma a la a, affidavit hman khawloh vanga ram leilung fate dikna leh chanvo chhuhsak a nih theih dan te, nakin zelah ram leilung fate tana thil ṭha lo zawk thleng thei a nih avangin affidavit hmanga saphunte pawh a theih loh dante mipuite an hriattir bakah, department hrang hrangte tan circular a chhuah tawh a ni.
Mizoram Law Commission hi April 21, 2009-ah hawn a ni a, hna a thawk nghal a ni.
John Siamkunga chuan, Law Commission member-te inpekna leh phûr taka Mizoram tana an thiamna leh finna an hmang ṭhin chu lawmawm a tih thu a sawi a, "Hei vang hian Law Commission pawhin hna ṭha takin a thawk ṭhin a ni," a ti.
Law Commission hmalakna Ṭhenkhat
Law Commission buatsaih 'The Mizo Marriage, Divorce and Inheritance of Property Act),2014' chu Assembly House-ah pass a ni tawh.
March 17, 2010 khan Mizoram sorkarah report hmasa ber thehluh a ni a, report No/l-ah hian pakhatna chu The Scheduled Tribes and Other Traditional Forest Dwellers (Recognition of Forest Rights) Act, 2006 (Central Act No.2 of 2007) a ni. Hei hian Forest area-a chengte tana hamṭhatna chi hrang hrang a keng tel a, sorkar pawhin a hlawhtlin theih nan chak takin a bawhzui nghal.
Thingtlanga thubuai hlabuaite awlsam zawka chinfel a nih theih nan The Gram Nyayalayas Act, 2008 (Central Act No.4 of 2009) chu a hlawhtlin theih nan sorkarin theihtawpin hma a la zui.
January 13, 2012 khan Mizoram sorkarah report vawi hnihna an thehlut a, report no. 2-ah Mizoram chhunga Cr.PC Section 144 hmanga District Magistrate/Deputy Commissioner ten order an chhuah tam lutuk leh Cr.PC Section 144 hmang loa dan tlawhchhan tur a awm leh awm loh chian hmasak a ṭul thu te, dan ding lai a awm reng laia Cr.PC Section 144 hmanga khapna thupek siam pawi theih dante tarlan a ni. Hei hi Mizoram sorkarin bawhzui nghalin, tunah chuan ṭul bik tê-ah chauh Cr.PC Section 144 hmangin order chhuah a ni tawh.
Kum 2011 khan 'The Mizoram Swimming Pool Regulation' chungchangah kaihhnawih department-te hma la tura ngenna an pe.