MZU-ah MNF policy SEDP zirho a ni

Mizoram University Students' Council (MZUSC) chuan nimin khan MZU Multipurpose Hall-ah MNF party policy 'Socio-Economic De­velopment Policy' sawi­hona hun an buatsaih.

SEDP sawihonaah hian MZU-a Political Science, Public Adminis­tration, Sociology, Econo­mics, Commerce leh Mizo department-a zirlaite an tel a; Students Welfare dean Dr F Lalnunmawia, PA department HoD Prof. Lalhnehzovi leh zirtirtu dangte'n an telpui. MNF aṭangin vice president Dr R Lalthangliana hoin Policy Committee mem­ber-te an tel bawk.

MZUSC hruaitute chuan, SEDP sawihona hun an buatsaih chhan chu, ṭhalaite'n Mizoram siam ṭhatna an vei thu te, an ram veinain awmzia a neih theih nan university aṭanga ṭan a ṭula an hriat thu te, party hrang hrangte hmalak dan tur hriat leh sawipui pawimawh an tih thu leh, political party dangte pawh an policy-te sawipui zel an la tum thu an sawi.

MNF vice president Dr R Lalthangliana chuan, MZU zirlaite'n ram siamna kawng an ngaihtuahnaah MNF an sawm hmasa ber chu lawmawm a tih thu a sawi a, "SEDP hi pawisa sem ringawt a ni lo a, mipui leh ram din chhuah tak takna atan sorkarin mipuite dâwm kân a tum na a ni," a ti.

SEDP chu MNF-in sor­karna a chan tûk aṭanga hmalakna ṭan nghal theihna tur programme a ni tih sawiin R Lalthang­liana chuan, "SEDP hian Mizoram mamawh a fûn kim hle. Khaw pakhat hma­sawnna tur aṭanga ram leh ram insumdawn tawnna thlengin, ramri buaina ṭanga social security service thlengin a huam a ni," a ti.

MNF Vice President chuan, Mizoram khaw hrang hrangah mipui ro­relna tak tak a pian theih nan mipui rorelna, tualchhung sorkar din an tum thu leh, mipui tan hna a tam thei ang ber siam turin out­sourcing policy an kalpui dawn thu a sawi bawk.

Sawihona hunah hian MNF hruaitute'n SEDP an sawifiah a, zirlaite'n an ngaihdante an sawi bakah, an hriat chian duhte an zawt a ni.