'My city, my heritage' inelnaah Mizo

INTACH-in India ram pum huapa sikul naupang, pawl 5-9 inkar tana essay leh lemziaka intihsiakna, 'My city, my heritage' tih thupui hmanga an buat­saihah Mizo zirlai eng emaw zat an tel a; tel zinga Mizo zirlai ṭhenkhat an ti ṭha hle. Inelnaah hian India rama sikul naupang 12,000 chuang an tel.

Intihsiaknaah hian essay thupui awm sa an ziah bakah, a lem (drawing) an ziah a ngai bawk a; intihsiakna hi Mizoramah chuan INTACH Mizoram Chapter leh School Education Directorate-in an buaipui a ni.

Intihsiaknaah hian St. Paul's HSS-a pawl 9 zirlai Ngurtluangpuii Ralte chuan, ‘Kawtchhuah Ropui Vangchhia’ chan­chin a ziah hmangin national winner 15 thlan chhuah zingah 6-na a ni a; New Delhi-ah lawmman dawng tur leh heritage-te en turin a kal ang.

St. Paul's HSS-a pawl 9 zirlai dang, Lalrinnungi leh Lalruatkimi Hnamte te chu regional winner 100 thlan zingah telin, 81-na leh 86-na an ni. Lalrinnungi essay thu­pui chu, ‘Thenzawl - The Historical Village of Mizo­ram’ tih a ni a; Lal­ruat­­kimi Hnamte essay thupuji chu ‘My city, my heritage’ tih a ni. An pahnih hian certificate leh trophy an dawng dawn a ni.

INTACH Mizoram Chapter convener P Ro­hmingthanga chuan, Mizo zirlaite India ram pum huap inelnaa a ti ṭha zinga an tel pha chu INTACH Mizoram Chapter-in an lawmpui tak zet tih a sawi.