KHAWTHLIR

Committee on Utilization of Chief Minister’s Relief Fund for Covid-19 rèl angin, nimin khan CM Relief Fund aṭangin cheng nuai 91.19 pek chhuah a ni. Sum pek chhuahnate chu - Covid-19 hospital ni tura ZMC inbuatsaihna phuhrûk nan Rs. 84,78,395, Champhai DC (quarantine centre enkawlna senso) hnenah Rs. 5,00,000, Taiwan sorkar aṭanga puihna dawn Delhi aṭanga Mizorama phurh thlen nan Rs. 90,624 leh Bairabi task force-te hnenah Rs. 50,000 a ni.

Ṭhalai Kristian Pawl, Lunglei Chanmari Vengthlang unit chuan nimin khan Lunglei Civil Hospital blood bank-ah blood donation camp an huaihawt a, mipa 17 leh hmeichhia pathumte'n thisen unit 20 an pe.

July 14, Thawhlehni khan Lunglei Civil Hospital (LCH) laboratory-ah Truenat hmangin mi 30-te swab sample endik a ni a, Covid-19 vei an awm lo. LCH laboratory-ah hian July 4 thleng khan swab sample 643 endik a ni tawh a, Covid-19 vei mi 11 hmuh chhuah tawh a ni.

ZPM Ṭhalai chuan thuchhuah siamin, HSSLC Examinations 2020 leh HSLC Examinations 2020-a zirlai pass zawng zawngte thinlung taka an lawmpui thu an tarlang a, "An hma hunah hlawhtlinna duhawm tak chang zel turin duhsakna kan hlân. Hlawhtling rih lote pawh beidawnna aia tumruhna nen ṭan la lehzual turin kan chah," an ti. MPC party ṭhalaite pawhin HSSLC-a pass tharte an lawmpui thu leh duhsakna an hlan 

thu an tarlang bawk.

Ṭawi bialtu MLA R Lalzirliana, minister chuan Covid-19 dona atan Chief Ministers' Relief Fund-ah a MLA fund aṭangin cheng nuai 30 nimin khan a chhûng lut. R Lalzirliana hian a hmain MLA fund aṭang thoin CM Relief Fund-ah cheng nuai 20 a pe tawh a; MNF, ZPM leh BJP MLA-te'n MLA fund aṭanga cheng nuai 50 thawh an rèl chu a pe tla tawh a ni.