Zirlai khuaikhema puh 46 AR sipai pakhat man a ni

Aizawl khawpui lailia awm 46 Assam Rifles sipai pakhatin hmeichhe zirlai ṭhenkhat mawi lo taka a khawih nia hriat vangin May 8, Thawhṭanni zan khan AR gate bulah Mizo Students Union (MSU) an pungkhawm. Thil thlen hnu hian AR sipai Ajit Kumar (29) s/o Narsing Chaurasia, Maheshkhut, Khagaria District, Bihar chu police-in an man.

MSU tarlan danin, AR Middle School, Lam­muala zirlai hmeichhe ṭhenkhat chu 46 AR sipai Ajit Kumar chuan an inthiar turte a lo pawtpêng a, an hnuteahte a ṭhamsak luih bakah, quarters-ah hruai luihte a tum ṭhin niin an tarlang a, he thu hi MSU-in an hriat veleh bawhzui nghalin, Thawhṭanni zan khan MSU-te chu AR gate bulah an pungkhawm a; zan dar 11:30-ah Aizawl Police Station-ah MSU general secretary Lal­thanzuala hmingin FIR an thehlut zui a, MSU hruaitute hian 46 AR Commandant pawh an be pawp nghal a ni.

Ajit Kumar-a chet dan chu an dem thu sawiin MSU chuan, dan anga hrem ngei turin thuneitute an phût a; tun hnuah thleng tawh lo se an duh thu an tarlang bawk.