2016-17 ah thisen unit 25,895 pek a ni ; Mizoramah a thlawna thisen pek a pung

10th May, 2017

Kum liam ta, 2016-17 chhung khan Mizorama blood bank 10-ah thisen unit 25,895 pek a ni a, chu'ng zinga unit 21,563 chu chu a thlawna pek (voluntary donation) a ni a, voluntary donation hi 83.27% a ni. Thisen pek hi kum 2015-16 aiin unit 950-in a tam zawk a, voluntary donation percentage pawh 7.45-in a sang zawk.

Sorkar kum liam ta, April 2016 - March 2017 chhunga Mizoram puma thisen pek unit 25,895 hi kum 2015-16 chhunga pek zat unit 24,940 aiin unit 950-in a tam zawk a; a thlawna pek zat pawh kum 2015-16 chhungin unit 18,910 (75.82%) a nih laiin, kum 2016-17 ah chuan unit 21,563 (83.27%)-ah a kai chho a ni.

Kum 2016-17 chhung khan blood bank 10-te'n blood donation camp ṭum 406 an nei a, chutah chuan thisen unit 17,286 pek niin, hei hi thisen pek zawng zawng aṭangin 66.75% a tling. Kum 2015-16 chhung khan donation camp ṭum 384 neih a ni a, chuta ṭang chuan thisen unit 15,826 (63.46%) lak a ni.

Kum 2016-17 chhunga thisen pek la tam ber, Aizawl Civil Hospital (ACH)-in unit 14,215 an la a, hei hi blood bank dang pakuaa thisen pek zat aiin a tam zawk. ACH-a thisen pek unit 14,215 zinga unit 12,789 (89.97%) chu voluntary donation a ni a; ACH hian donation camp ṭum 156 neiin, chuta ṭang chuan thisen unit 9,384 (66.01%) an dawng.

Blood bank 10 zingah April 2016 - March 2017 chhunga voluntary donation ṭhatna ber chu Mamit District Hospital a ni a, anni hian thisen unit 280 dawngin, chu'ng zinga unit 265 (94.64%) chu voluntary donation a ni. A thlawna thisen pek hniamna ber chu Lunglei Civil Hospital niin, voluntary donation chu 61.94% a ni a; a dawttu Siaha District Hospital-ah 62.30% a ni.

Thisen pek kawnga mipui zirtir leh fuih hna thawktu Association for Voluntary Blood Donation (AVBD) chuan, kum 2016-17 chhunga thisen petute zawng zawng chungah lawmthu an sawi a; voluntary donation pawh kum hmasa lama a tlakhniam hnuah, kum 2016-17 chhunga a sang chho leh ta chu lawmawm an tih thu sawiin, Mizo ṭhalaite chu phût lêt nei loa a thlawna thisen pek uar zel turin an chah a ni.