KHAWTHLIR

HSSLC result
MBSE chuan May 11, Nilaini hian chawhnu dar 2-ah Higher Secondary School Leaving Certificate (HSSLC) Examination 2017 result a tichhuak dawn. Result hi MBSE office, Chaltlangah leh website www.mbse.edu.in ah en theih a ni ang.

Vaihlo endik
Lungleia Legal Metrology department, Police, MZP leh MHIP-te ṭangkawp chuan nimin khan Lunglei khawpui chhungah sumdawngte'n dan phal loha meizial leh vaihlo kaihhnawih an zawrh leh zawrh loh an enfiah a; dan phal loha cigarette zuarte dawrkai palite chu an thil zawrh chhuhsakin, dan angin an hrem dawn.

V/C training
SIRDPR chuan nimin khan Kolasib-a an conference hall-ah Rasthriya Gram Swaraj Abhiyan (RGSA) scheme hnuaiah village council member-te tan foundation course training an buatsaih a, Thingdawl RD Block chhung khaw 14-a V/C member 33 an tel.

Lirthei tlân khap
Traffic SP C Lalthanmawia chuan thupek chhuahin, May 11-23, 2017 chhungin Bethlehem Vengthlang (Advance Research Centre for Bamboo and Rattan bul) leh Chite lei inkar kawng dungah tui pipe phûm hna thawh a nih dawn avangin, he kawngah hian hna thawh hun chhung, zing dar 9 aṭanga tlai dar 5 inkarah lirthei tlân phal a nih loh thu a tarlang.

Têkin déng hlum
Nimin chawhnu dar 2 vel khan Lalhmingchuanga (38) s/o Saingengi Behliangchhip, Jampui, North Tripura chu an loa an fehnaah ṭêkin a dêng a, a hmunah a thi. Pu Lalhmingchuanga hian a nupui Biakhlupuii leh an fate pahnih a kalsan a ni.