Lungleiah climbing wall hawn a ni

LDSC Ground II, Lungleia artificial climbing wall dah thar chu nimin khan Sports & Youth Services minister Zodintluanga'n a hawng.

Zodintluanga chuan, Lunglei district-in hmasawnna bung thar a kai tih sawiin, climbing wall thar chu Lunglei mipuiin hmang ṭangkai se a duh thu a sawi a, "Climbing wall hmang hian talent nei ṭhate chher chhuakin, khawvel hriatah a inpho chhuah theih a ni," a ti.

Sports Minister chuan, hmasawnnain Mizo mipui rilru a luah khat tawh hle tih sawiin, "Hmasawnna ruhrel ṭha a thlen chuan mipuite pawh an lawm a ni," a ti a; Lunglei khawpuiin kawng tinrenga hmasawnna ruhrel ṭha a neih chu hriatpui turin kal khawmte sáwmin, hmasawnna awm lo anga inchhuah ṭhin chuan sorkar pawh a nawr kal lo ve thei niin a sawi.

Bialtu MLA Joseph Lalhimpuia, parliamentary secretary ni bawk chuan, Mizoramah hmasawnna ruhrel ṭha a awm tak avangin infiamnaah Mizote'n hma an sawn chak hle tih a sawi a, "India ram aiawh thlenga infiam mite kan nei ta a ni," a ti. Sorkarin Lungleiah hmasawnna tam tak a pe tih sawiin, chu'ngte chu hmang ṭangkai turin ṭhalaite leh mipui an pawimawh tih a sawi.

Climbing wall hawnna inkhawm hi Mizoram State Sports Council (MSSC) secretary C Laltlanthanga’n a kaihruai. MSSC engineer James Lalramnghaka sawi danin, artificial climbing wall hi kum 2014-15 Special Plan Assistance (SPA) sum Rs. 53,93,136 hmangin StepIn Adventure, North East Circle enkawltu David Zohmangaiha enkawlna hnuaiah siam a ni.

Climbing wall hi lead climbing leh speed climbing atana siam a ni a, national standard niin, national level competition thlen theihna tura a ni.