Aizawl district BJP pisa hawng

BJP Aizawl district pisa thar, Upper Republic-a mi chu nimin khan Mizoram BJP president Prof. JV Hluna'n a hawng.

Prof. JV Hluna chuan, sorkar laipuia BJP-in India rama state hrang hrangte chu chi thumin an ṭhen tih sawiin, "Mizoram BJP hi BJP chak lohna ber state, category C-ah dah kan ni. Hei vang hian BJP national president Amit

Shah-a'n min rawn tlawh ngei a ṭul thu ka sawi a, rei lo têah zan khat riakin Amit Shah hian Mizoram a rawn tlawh dawn a ni,” a ti.

MADC inthlan chung­changah JV Hluna chuan, “Mi tam takin MADC inthlan result-ah BJP min beisei dan pha lo viauin ngai mah se, keini chuan kan beisei aiin hmasawn nan kan hmang zawkin kan inhria. Inthlan hma aiin inthlan zawhah MADC chhunga kan party mi leh sate an phûr zawk," a ti a; MADC inthlan chu unit nei mumal loa hmachhawn an nih thu a sawi.

MNF party-in MADC-a seat ṭhenkhat an lak chungchangah JV Hluna chuan, “MNF hi lawmpui tur nge lawmpui loh tur tih kan hre lo. Keini ai chuan an chak a ni tih kan pawm a, amaherawhchu, MNF leh MDF-te aiin inthlan zawhah MADC-a kan mi leh sate an phûr zawk a, hma lamah beiseina an nei sang zawk," a ti.