Zirna hmasawn dan tur sawiho
Lawngtlai District Education Committee (SSA Mission) chu Thawhṭanni khan Lawngtlai DC Dr A Muthamma hoin DC conference hall-ah an ṭhu a; an district chhunga elementary level zirna tihhmasawn dan tur an sawiho.
Lawngtlai district chhunga naupang sikul kal lo leh zirna chawlhsan tam lutuk tihniam tur leh zirlai tam zawk sikul kaltir tura hmalakna atan, Project Let's LEarn And Progress (LLEAP) chu Lawngtlai DC hoin duan a ni. Hemi hnuaiah hian April 17-19, 2017 chhung khan Lawngtlai district chhunga zirna lama hnufual zual khawthlang lam khuaahte enrolment drive kalpui a ni.
Enrolment drive-ah hian zirna kaihhnawih leh department dang ṭhenkhata thawkte chu pawl pariatah inṭhenin, khaw 28 an fang chhuak a; khawtlang hruaitu, nu leh pa, tlawmngai pawl, zirtirtu leh sikul naupangte nen inkawm khawmna buatsaihin, zirna ngai pawimawh turin an chah ṭhin a ni.