Sorkarin RT-PCR bun belh aiin Truenat bun belh ṭha a ti zawk - Health department
Health department chuan thuchhuah siamin, Mizoram sorkarin sample endikna atan senso tam leh enkawl hautak RT-PCR bun belh aiin, Truenat khawl bun belh ṭha zawka a hriat thu an tarlang.
Health department chuan, Covid-19 vei leh vei lo endikna khawl ṭha bera ngaih chu RT-PCR khawl a nih thu tarlangin, "A tam thei ang ber endik a, a vei leh vei lote zawng chhuak a, hri veite chu a ṭul anga a ṭha thei ang bera enkawl zel hi sorkar duh dan leh tum ber a ni. Hripui thâwm kan hriat tirh lai khan hetiang khawl ṭha hi kan nei lo a, sorkar hmalaknain ZMC-a TB Laboratory BSL-2 buatsaih fel ṭêp tawh behchhanin, khawl mamawh ṭul angte la khawmin mithiam bikte kaihhruaina hnuaiah hun rei lo te chhungin RT-PCR khawl bun a ni," an ti.
ZMC-a RT-PCR dah chuan April 7, 2020-ah hna a thawk tih sawiin, "Mizoram páwn aṭanga lo haw tur sing chuang an awm avangin khawl pakhat chauh chu a tâwk zo loa hriat a ni. IBSD, Manipur aṭangin khawl pakhat min hmantir hlauh mai. Hei bakah hian, Hauva & Sons-te'n khawl pakhat leina tur sorkarah an chhûng lut a ni," an ti a; NHM hnuaia lei RT-PCR khawl pakhat a thlen ṭêp thu an tarlang bawk.
RT-PCR khawl pathum hmangin ngawrh taka hna thawh a ni a, hna a chak leh zualna turin automated RNA extractor pakhat lei a nih thu tarlangin, "Lungleiah Truenat khawl pahnihin hna a thawk reng bawk a, a dang pakhat pawh bun leh tawh a ni. Hetia chak taka sorkarin hma a lak avangin sample tam zawk endik theih a ni," an ti a; ZMC-ah sample lak sa zawng zawng endik zawh a nih tawh thu an sawi.
HFW department chuan, MLA-te leh mi inphal ṭhenkhatte'n RT-PCR khawl leina atana sum thawh an inhuam thu an au chhuahpui tih tarlangin, "An chungah sorkarin lawmthu a sawi tak meuh a ni. Amaherawhchu, tuna kan dinhmun mek uluk taka thlirin, RT-PCR khawl neih belh zel hi kan mamawh ber a ni em tih uluk taka zir hmasak hi sorkarin ṭulin a hria a, a zir chiang turin expert team-te Lunglei, Siaha leh Champhaiah tirh a ni," a ti.
Health department tarlan dangte
Expert team report-a a lan danin, Lunglei, Siaha leh Champhaiah RT-PCR dahna tur hmun an nei a, mahse, nasa taka chei
ṭhat a ngai. RT-PCR bun nan laboratory equipment an nei lo a, ngaihtuah chawp vek ngai a ni.
RT-PCR kháwlin ken tel tam tak a nei; a tlem berah microbiologist pahnih, laboratory technician pali leh thawktu dang a bika zir tawh eng emaw zat a ngai.
BSL-3 emaw BSL-2 laboratory sum tam tak sénga din hmasak a ngai.
Biological Waste Management leh Liquid Waste Management System ṭha tak, internet connection ṭha leh power supply mumal a awm a ṭul.
Laboratory awm sa behchhan tur a awm loh chuan a hautak a, hun rei tak a ngai a, ICMR phalna a ngai bawk.