Inkhung hran dan tur ruahmanna Zâwm ngei turin BSF hriattir a ni

Consultative Committee on Health & Family Welfare chuan nimin khan an chairman Dr R Lalthangliana, Health minister hoin quarantine facility hrang hrang an tlawh. Committee chuan, Border Security Force (BSF) sipaite chu sorkarin in­khung hran dan tura ruahmanna a siamte khauh taka zâwm ngei turin an hriattir.

Consultative Committee hian BSF sipai 100 khung hranna hmun Falkland Venga Rajiv Awas Yojana (RAY) an tlawh a; BSF-te chu sorkarin inkhung hran dan tura ruahmanna a siam­te khauh leh dik taka zâwm turin an hrilh a; a bik takin, an chheh­vela awm khawtlang mipui leh local task force-te nen harsatna an neih loh nan fimkhur hle turin an chah.

RAY-a quarantine centre-ah hian BSF sipai 100 khung hran mek an ni a, an zingah July 14, Thawhlehni khan Covid-19 vei mi panga hmuh chhuah niin, nimin khan State Referral Hospital-ah dah luh an ni. BSF quarantine centre viltu Dr Khole Key chuan, RAY building block B, C, D leh E-ah BSF sipai, Mizoram páwn aṭanga hawte dah an nih thu a sawi a, "July 2, 2020 aṭang khan he quarantine centre hi luah ṭan a ni a, ni 21 chhung khung hran an ni dawn. Sipaite hi an swab sample vawi hnih endik a ni tawh," a ti.

Consultative Committee member-te chuan, khung hran chungchang chu fimkhur leh khauh lehzuala kalpui ṭul an tih thu sawiin, "Mizoram páwn aṭanga lo lutte chu a theih chin chinah Aizawla dah ṭhin ni se. R Dengṭhuama Hall an chhuahsan hnua Aizawl páwn lama kal tur an nih chuan an kalna tur district leh khua bakah, an paltlang tur district thuneitute nen ṭanghoa lo vil chhunzawm a ṭul," an ti.

R Dengṭhuama Hall aṭanga an awmna hmun pan turte'n anmahni bakah, mi dang himna turin sorkarin dan a siamte uluk leh fimkhur taka an zawm ngei an duh thu sawiin Committee hotute chuan, "Vairengte screening point thlen aṭangin Mizoram sorkar dan siam khauh taka an zawm a ngai," an ti a; mimal lirtheia haw turte pawh fimkhur taka dan zâwm turin an chah.

Quarantine centre hrang hrangte chu medical team leh Covid-19 Committee on Psychological & Social Guidance-in an vil reng. Khung hrante chu khung hran an nih aṭanga ni 5-10 inkarah swab sample laksak ṭhin an ni a; quarantine hun ni 14 an hman zawh hnuah an sample test negative a nih a, insawiselna an neih loh chuan in lamah uluk taka inenkawl zui turin chhuahtir ṭhin an ni.

Consultative Committee on Health & Family Welfare-in quarantine facility-te an tlawhnaah hian chairman bakah, Dampa bialtu MLA Lalrin­tluanga Sailo leh Tuirial bialtu MLA Andrew H Thangliana te an tel a; Health & Family Welfare Board vice chairman Dr ZR Thiamsanga, MLA-in a ṭawiawm a ni.