Mizorama cricket hmasawnna tur sawiho

Board of Control for Cricket in India (BCCI) affiliation committee member pahnih - Prakash Dixit leh Anshuman Gaikwad-te chuan Thawhlehni tlai khan chief minister Lal Thanhawla, Cricket Association of Mizoram (CAM) president ni bawk chu CM bangla-ah an kâwm a, Mizorama cricket hmasawn dan tur an sawipui.

Lal Thanhawla chuan CAM bul ṭan dan sawiin, "CAM-in BCCI a zawm remtihna chu 2012 khan khatih laia BCCI president Jagmo­han Dalmiya kaihhruaihna hnuaia committee-in a thuphungin a pe tawh a, mahse, hmalakna a awm zui ta lo a ni," a ti a; BCCI Affiliation Committee-in CAM-in affiliation a neih theihna atana Mizoram dinhmun a zir chiang dawn chu lawmawm a tih thu a sawi.

BCCI affiliation member-te chuan Aizawl leh a chhehvela cric­ket hmunhma leh cricket khelh­nate an tlawh thu sawiin, "Mizorama cricket a lâr chho mek a, a hmuhmate pawh buatsaih mek a ni," an ti a; an thil neih sa tlemte hmanga sorkar leh CAM-in cricket hmasawnna atana an hmalakna chu fakawm an tih thu an sawi.

Prakash Dixit leh Anshuman Gaikwad-te hian Thawhlehni vek khan Suaka Memorial Cricket Ground, Sihmui leh Aizawla cricket khelhna ground dang pahnih - Ramhlun Sports Complex leh Durtlang te an tlawh a; an thil hmuh dante chu BCCI-a an thehluh hnuah, affilation chungchang chu BCCI-in an ngaihtuah dawn a ni.

Cricket Association of Mizoram hi kum 1992-ah din a ni a, a tirah club 5/6 chiah an awm a, tunah hian club 35 vel an awma hriat a ni.