Zirlaite'n nuam ti taka lehkha an zir theih kan ngai pawimawh - H Rohluna

School Education minister H Rohluna chuan, zirlaite by-heat system-a kal loa nuam ti taka lehka an zir theih chu Mizoram education system-in an tum ber a nih thu a sawi.

Kawrtethawveng Middle School I-in an kum 60-na, diamond jubilee an lawm a hmanpunaah H Rohluna chuan, "Tun­ah hian middle school chin zirlaibu hi NCERT kan hmang ṭan a, textbook chhah pui ni loin mithiamte buatsaih activity tam tak zirlaite'n nuam ti taka an zir theih nan a buatsaih a ni. Zirlaite'n by-heart system-a kal loin, joyful learning system-a an zir hi kan education system tum ber a ni," a ti.

School Education Minister chuan, sokarin zirna a ngaih pawimawh thu sawiin, "Hun rei lo teah hmasawnna tam tak kan hmuh thuai ka beisei. Middle school-a pawl 6-8 zirlaite chu English medium-ah leh vek a ni tawh," a ti a; sikul huang chhungah zirlaite leh zirtirtute chu English hmang turin a chah.

School headmaster-te recruitment rules (RR) tihdanglam a nih thu sawiin Rohluna chuan, "Seniornity leh limited departmental exam aṭangin 50% ve ve kaisan theih tura duan a ni a, hun rei lo teah headmaster ṭha tak tak kan nei thuai ang," a ti.

Bialtu MLA Lalrin­mawia Ralte pawhin thu sawiin, zirlaite chu nu leh pate thu âwih turin a chah a, "Nu leh pate pawhin kan fate private school emaw, sorkar school emawa kalte thliar hranna nei loin ngaihsak ṭha a, an mamawh ang phuhrûksak a ngai," a ti.

Kawrtethawveng M/S-I hi May, 9, 1957-a din a ni a, mi hlawhtling tam tak an chhuak tawh a, chung zingah chuan minister, MLA leh AMC councillor-te an tel a ni.