Serchhip Dist. a khuate ODF-ah an inpuang vek

Swachh Bharat Mission (Gramin) hnuaia India ram pum kum 2019-ah pawn lama inthiar awm lohna, open defecation free (ODF)-a puan tumna kal zelah, Serchhip district-a thingtlang khua zawng zawngte chuan ODF-ah an inpuang (self declare) tawh.

Thu dawn danin, Serchhip dis­trict-a khua zawng zawngin ODF-a an inpuanna hi Mizorama SBM (Gramin) kalpuitu PHE department chuan an dawng tawh a, PHE pawhin online entry pawh an ti nghal a ni.

Serchhip district-a khuate hi ODF-a official-a puang tur chuan Block Level Committee-in an endik vek phawt a ngai a, Block Level Committee chuan endik hna pawh an thawh ṭan nghal an tum. Block level-a endik hnuah district level-ah DC pisa lamin an endik leh dawn a, chumi hnuah state level-in endik leh a ni bawk ang.

PHE hnuaia Community Ca­pa­city Development Unit (CCDU) hmalaknain Serchhip district-a SBM(G) hmalaknate chu documentary film pawh siam mek a ni bawk a, documentary film siamtu team chuan nimin zing khan

Keiṭum leh Bungtlang khuate an tlawh. Nimin vek khan PHE department-in Baktawnga bawlh­hlawh tuiril paih dan (liquid waste management system) an en bawk.

SBM kalpui hna hi thingtlang leh khawpuiah ṭhen a ni a, Mizo­ramah chuan khawpui lama hma­lakna SBM(Urban) chu UDPA department-in an kalpui a, thing­tlang lama hmalakna SBM (Gramin) chu PHE department-in an kalpui thung.

Swachh Bharat Mission hnuaiah hian sorkar laipui chuan October 2, 2019-ah India ram pum chu ODF-a puan hman a tum a ni.