KHAWTHLIR

Phal loh man
World No Tobacco Month pualin Thawhlehni khan Lawngtlaia Food and Drug Administration (FDA), Anti-Tobacco Squad (ATS), MHIP leh Police-te chuan joint operation neiin, Lawngtlai khaw chhunga dawrte an enfiah a, dan phal loh vaihlo leh a kaihhnawih an zawrhte an man. Joint Operation team hian Shikhar báwm 30 leh Pouch 93, S-Ten báwm 56 leh pouch 134, Farstar carton 50 leh pack 3, Valiant carton 51 leh pack 3 an man a; dawrkaite chu zuar nawn tawh lo turin an hriattir a ni.

Fa lâk zat
Social Welfare department hnuaia State Adoption Resource Agency (SARA) chhinchhiah danin, kum 2016 chhung khan Mizoramah dan anga fa lak mipa 13 leh hmeichhe 17, an vaiin 30 an awm.Fa lâk zinga 26 chu India ram chhunga pek a ni a, mi dang pali chu India ram páwna pek a ni. Kum 2005 aṭanga nikum kum tawp thleng khan Mizoramah fa lak 292 an awm tawh a; chung zinga 261 chu ram chhunga pek niin, mi 31 chu India ram pawna pek a ni.

ITI Vengah bomb
Nimin zing dar 2:45 vel khan ITI Vengah KVL Hruaitluanga tipper MZ-01 N-0772 bulah bomb a puak a, tipper a chhe nual. Thu dawn danin, tipper bula bomb puak hi gelatine a nih rin a ni a, tipper bakah a bula city bus MZ-01 D-3579, Ramropuia, ITI Veng ta pawh a darthlalang a keh nual a ni. Tipper hi January 6, 2017 khan zing dar 2 velah khawih a lo ni tawh a, a neitu KVL Hruaitluanga bike pawh October 2016 khan hâl a lo ni tawh bawk.

BDO training
SIRDPR chuan nimin khan Durtlanga an hmunah 'Refresher Course for Block Development Officers' Training' an buatsaih a, BDO 26 an tel. Training hian May 12 thleng a awh dawn a, BDO-te chu thupui hrang hrang - Village administration in Mizoram: Problem & Prospect, accounting procedure, CSS scheme leh thil dangte zirtir an ni.