Bible House atan GAD ram pe dawn

Upper Khatlaa Mahatma Gandhi Road-a Bible House dinna lei a tlakhniam vanga ṭhiah tak sak ṭhat lehna atan Mizoram sorkar chuan Bible House sira BSNL office kawm-thlanga General Administration department (GAD) ram a pe dawn.

Thu dawn danin, sorkarin Bible House sak thatna atana ram a pek tur chu buaipui mek a ni a, a sak ṭhatna atan Mizoram sorkar chuan budget-ah cheng nuai 430 vel a dah a ni.

Bible House leh a sira Baptist House chu a thlang lam aṭanga lei a tlakhniam avangin dinhmun hlauhawmah an ding a; Bible House chu ṭhiah zawh a ni tawh a, Baptist House pawh a chhunga chengte'n an chhuah tawh bakah, bungruate thiar chhuah vek tawh a ni.

Bible House leh Baptist House thlang lama Circuit House hmun hluia Convention Centre tur sakna atana lei laih zâwl pawh a tlakhniam avangin, lei chê tihnghehna turin thuk taka lei laiin, cement concrete chhun a ni a; a chung lama lei che zel tur ven nan lung remin, thir lena tuam (gabion wall) mek a ni bawk.