Sum enkawla hlawhchhamah sorkar puh

MNF president Zoramthanga chuan, Congress party kaihhruai sorkar chu sum leh pai enkawlah an hlawhchham nia sawiin, "Sum leh pai enkawl hlawhchhamtute hi he ram enkawl zui zel tlak an ni lo," a ti.

Zoramthanga hian nimin khan Hualngo­hmun khuaa Vanlalnghaka inah MNF zawm thar lawm luhna inkhawmah thu a sawi a; MNF sorkar laiin Mizoram budget chu cheng vbc. 500 chuang âwrh a nih laiin, Congress sorkarah chuan budget a lety tam takin a pung a, chuti chung chuan ram hmasawnna atan Congress sorkar aiin MNF sorkarin hna an thawk nasa zawk niin a sawi.

Zoramthanga chuan, "Heti khawpa sum a tam chunga development a châwl ṭhup te, sorkar hnathawk hlawh la mumal thei lote hi a mak hle. Heti khawpa Zoram suma a harsa chung hian ṭhenkhat chuan helicopter chuan nuam an la ti viau site hi a vanduaithlak hle a ni," a ti.

MNF sorkar hunah buh thar tam an ngaih pawimawh dawn thu sawiin Zorama chuan, "Lo neitute dâwm kân nan SEDP hmangin nasa leh zualin hma kan la dawn," a ti a; SEDP-ah chuan retheihna aṭanga mipui khai chhuahna tur leh ṭhalai lehkhathiamte tan ruahmanna ṭha tak a awm thu a sawi.

MNF President chuan, Congress sorkar hnuaiah kum hnih leh thla thum vel zu zawrh a nih tak chhungin zu vanga thi an tam tawh hle niin a sawi a, "Zu vanga thi hi 5,000 - 6,000 vel an ni hial tawh ang. Zalenna kum 20 kan sual chhung khan rál lakah mi 3,000 vel kan thi a, kum 20 chhung a rál laka zalenna sualtu hnam sipai thi aiin Congress sorkarin zu a zawrh vanga thi an tam zawk," a ti.

MNF thuchhuah chuan, Zoramthanga hian nimin khan Hualngohmun khuaah party hrang hrang aṭangin voter 59-te MNF-ah a lawm lut niin a tarlang.