Mizoram chhungah Assam mite'n dawr an siam - MSU

Mizo Students' Union (MSU) Gen.Hqrs chuan thuchhuah siamin, Assam leh Mizoram inrìna bul, Mizoram chhungah tun hnai aṭangin Assam mite'n dâwr an siam niin an tarlang.

MSU chuan, Mizoram chhunga Assam mite'n dâwr an siam chu June 26, 2020 khan a hmunah enfiah turin MSU Gen.Hqrs. leh Kolasib-a MSU hruaitute an kal tih sawiin, Vairengte SDO (Civil) leh SDPO kaihhruaina hnuaiah dawr an sakna hmun chu an tlawh tih an sawi a, "Mizoram chhungah ngei a ni tih finfiah a ni," an ti.

Assam mite'n dawr an siamna chu Mizoram chhung ngei ni mah se, hripui léng mek vang te, boruak ṭha lo zawk a thlen hlauhthawn vang leh Vairengte khawtlang hruaitute'n lockdown zawh rualin ṭhiah leh nghal a nih theih nana hma an lak tur thu leh anmahni chu ring tura MSU an ngen avangin MSU chuan hma la zui rih loin an ngaichâng rih dawn niin an sawi.