Covid-19 vei mi 5 hmuh belh

Zoram Medical College (ZMC) Covid-19 Laboratory-a July 14, Thawhlehnia swab sample endiknaah Covid-19 hripui vei mi panga hmuh chhuah belh a ni. Heti hian Mizoramah hripui vei hmuh chhuah tawh zat chu mi 238 an ni.

Covid-19 vei Thawhlehnia hmuh chhuahte chu Border Security Force (BSF) mi, hnam dang kum 42-53 inkar an ni. An vaiin Falkland Venga RAY building-a khung hran lai, taksaa harsatna nei lo (symptom lang lo) an nih thu leh,

Maharashtra leh Jharkhand mi pahnih ve ve leh West Bengal mi pakhat an nih thu sorkar thuchhuah chuan a tarlang. Hetih lai hian, an zinga pakhat chu state páwn aṭanga rawn lut thar ni lo, Mizorama awm sa nia thu dawn a ni.

July 14-a ZMC-a endikte chu mi 224 an ni a, State Referral Hospital (SRH)-a awm mek mi panga leh Aizawl district mi 184 bakah, Champhai district mi 18, Khawzawl district mi paruk, Assam mi panga, Bihar mi pahnih, Lunglei leh Serchhip district mi pakhat ve ve leh, Chandigarh leh West Bengal mi pakhat ve ve an ni.