Minister-in infiamna hmunhma a enfiah
Sports & Youth Services (SYS) minister Robert Romawia Royte chuan June 27, Inrinni khan Kolasib, Vairengte leh Kawnpuiah infiamna hmun din dan tur a enfiah. Minister hi Kolasib bialtu MLA K Lalrinliana, minister of state leh Serlui bialtu MLA Lalrinsanga Ralte ten an ṭawiawm.
Robert Romawia chuan, Kolasib Saidana Regional Sports Training Centre-a football khelmuala phûl phah mek a tlawhnaah, FIFA-in football ground awm dan tur a duan anga siam a nih thu sawiin, "FIFA certified football ground hman theih mai tura peih ṭêp a ni. Mizo infiammite'n an hman ṭangkai hle ka ring," a ti a; RSTC-ah hian infiamna chi thum tal awm thei tura ruahman a nih thu a sawi.
SYS Minister hian Kolasib-ah hian Hmarvenga standard futsal ground, standard basketball court leh volleyball court awmna tura hmun ruahmante a enfiah a; Kawnpui football ground chu standard ground ni pha tura tihchangtlun a, phûl lem phah dan tur, basketball court leh volleyball court siam dan turte a en bawk.
Finance Ministry hnuaiah Externally Aided Project (EAP) sum hmangin Kawnpuia sports complex sak a nih theih nan DPR siam ṭan a nih thu Sports Minister chuan a sawi.
Vairengtea sports training centre dinna hmun tur enfiahnaah Robert Romawia chuan, "Vairengte hi Serlui biala khaw lian ber a nih avang leh hmun lum a nih avangin sorkarin sport training-na hmun ṭha ruahman a tum a ni," a ti.
Kum 2018-a MLA inthlan dawnah Vairengteah amah ngei kalin MNF-in sorkarna an siam chuan Vairengteah sports training centre an din tur thu a puang tih sawiin SYS Minister chuan, chumi tihhlawhtlin ngei tum chuan Vairengte a tlawh thu a sawi a ni.