Intiamna tihlawhtling turin sumdawngte'n sorkar beisei

Mizorama sumdawng pawl hrang hrang 40 intél khawm, Mizoram Sumdawng Pawl Joint Committee chuan June 27 khan thuchhuah siamin, "Sor­karin July 1, 2020 aṭanga sumdawng zawng zawngin zalên taka mahni sumdawnna hmuna hna kan thawh ngei theih nana kawng hawnsak min tiamna pawh lawmawm kan ti a, min tihhlawhtlinsak ngei kan beisei," an ti.

Sumdawng pawlte chuan, sumdawngte harsatna ngaihsak tura an ngennaah sorkarin hma a lak nghal avangin an lawm thu an tarlang a; sumdawnna lirtheite odd-even anga intlàn chhâwk chuan mipui tan harsatna a thlen nia sawiin, inkhàrkhip hmaa intlân chhâwk dan an neih sa anga tlân phalsak turin sorkar an ngen.

Sumdawng Pawl Joint Committee chuan, Mizorama sumdawngte zingah bank lama harsatna nei an awm chuan pawl hruaitute hnena thlen turin an chah a, "India sorkarin Covid-19 vanga sumdawngte tana bank kaltlang hamṭhatna a siam ang taka awlsamna siamsak turin Mizorama bank zawng zawngte kan ngen bawk," an ti.