Mizoram hi ropui takin a chhuak thei ; He vision hi ṭhalaiin in neih ka duh - CM

Mizo Students Union (MSU) chuan nimin khan Vanapa Hall-ah kumin Mizoram University hnuaia under graduate exami­nation-a ti ṭha zual Mizo zirlaite chawimawina an buatsaih a, khuallian chief minister Zoramthanga chuan, Mizoram chu ropui takah a chhuah theih thu sawiin, "He vision hi ṭhalaiin in neih ka duh," a ti.

CM Zoramthanga chuan, Indopui Pahnihnaah Japan an che buai a, an tláwm a, an economy pawh tihngaihna awm lo khawpa a chhiat thu sawiin, "Ṭan an han la tak tak a, tunah chuan economy ropui pasarih zingah an tel tawh. Khati khawpa chhia kha ropui takah an awm thei. Mizoram pawh hrehawm tak, harsatna tinréng karah ropui takin kan chhuak thei," a ti a, Mizoram chu ropui takin a chhuak thei tih chu ṭhalaite hmathlirah awm se a duh thu a sawi.

Mizoramin lei chung, boruak leh lei chhung hausakna a neih ṭhat thu sawiin Zoramthanga chuan, "Japan leh Israel-te Mizo mipui zat Mizoram hi ram ruak niin chemtum nen lo lut se, kum 10-20 ah chuan India state-a per capita income sang ber zingah an chhuah ngei nang pawhin i ring ang, kei pawhin ka ring. Chu challenge chu kan kutah, ṭhalaite kutah a awm. Japan leh Israel-in lei hnuai hausakna oil leh gas an nei lo, keini chuan kan nei scientist-te'n an ti, kan zawng mek," a ti.

Chief Minister chuan, hmasawnna chu vawi leh khatah awmtir thut a har tih sawiin, "India rama awm chuan India system nen kal a ngai. Ni 100 inhlawhna min pekte hi ka ui, kan duh anga development-a hman turin min pe se, ṭha kan tih angin hmang ila, a ropui dawn," a ti a; a hmathlirte pawh vawi leh khatah a tih theih loh avangin manganthlak a tih thu a sawi.

Chawimawina dawngtute chu an kal zelna turah thâ thlah loa theihtawp chhuah zel tura duhsakna hlanin Zoramthanga chuan, "Zirna hi eizawnna kawngah chauh ni loin, mihring pangngai, mi zahawm leh ràwn tlaka min siamtu a ni. Ruih theih leh zûk leh hmuamte hian mi, a nih theih ang ni thei loah a siam fo ṭhin hi a veiawm," a ti a, zirlaite chu ruih theih thilah fihlim turin a chah.

Inkhawmah hian MSU president J Lalmuanzuala leh uaptu John Lalpeka te pawhin thu an sawi a; MZU under graduate-a subject tina ti ṭha ber Mizote hnenah chawimawina an hlan a, MSU buatsaih article inziahsiak lawmman sem a ni bawk.