Chess Olympiad meichher Mizoramah

Chess Olympiad meichher (torch relay) hmasa ber neih mek chuan nimin khan Mizoram a rawn thleng a, a pualin Lengpui community hall-ah inkhawm buatsaih a ni a, Sports & Youth Services minister Robert Romawia Royte-in a hmanpui.

Meichher hi Chess Olympiad vawi 44-na, kumin July 28 aṭanga August 10 inkara Chennai-a neih tur puala buatsaih a ni a, June 19, 2022 khan ṭan a ni. Meichher hian ni 40 chhungin India rama khawpui 75 a tlawh hnuah July 28, 2022 khian Chess Olympiad neihna tur Chennai-ah a lut ang a, inelna ṭan nghal a ni ang.

Chess grandmaster Mitrabha Guha-in Sports minister Robert Romawia hnenah Olympiad Torch a hlân a; Mitrabha Guha hian Mizorama chess player ṭhenkhatte a rualin a inkhelhpui a ni. Meichher puala inkhawm zawhah Mitrabha Guha hnenah hlan lêt a ni a, nimin khan Arunachal Pradesh panpui leh nghal a ni.

Torch Relay puala inkhawmah SYS Minister chuan, khawvel pum huap infiamna puala buatsaih meichherin Mizoram a thleng chu ropui a tih thu leh chhinchhiah tlak a nih thu a sawi a; chess chu thluak sâwizawina ṭha tak a nih thu sawiin, "Thluak hman ngai tak a nih avangin chess thiam tur chuan ngaihtuahna fím hman theih a ṭul a, ruih theih thila insûm a ngai hle a, zirlaite leh ṭhalaite phei chuan uar se a duhawm," a ti.

Chess Olympiad meichher puala inkhawm hi SYS director Joseph H Lalramsanga'n a kaihruai a; MLA H Biakzaua, Mizoram State Sports Council secretary John Ṭanpuia, MSSC hnuaia pawl hrang hrang aiawh te, Mizoram Olympics Association aiawh, United Sports Association of Mizoram aiawh te, college leh sikul ṭhenkhat zirlaite an tel. Mizoram Chess Association president Dr Lalhmuchhuaka pawhin thu a sawi a ni.