Grape wine man neitu thi ta hnenah zangnadawmna pe turin sorkar phût

Mizoram Pradesh Youth Congress Committee (MPYCC) chuan May 27, 2022-a Millennium Centre-a grape wine man neitu zinga mi, July 11, Thawh­ṭannia thi ta Lalhriat­puii, Dawrpui Vengthar chhungte hnenah zángnadawmna cheng nuai 100 pe turin Mizoram sorkar an phût.

MPYCC hruaitute chuan nimin khan Excise & Narcotics minister Dr K Beichhua an hmu a, Lalhriatpuii (L), Dawrpui Vengthar chhungte hnena zangnadawmna cheng nuai 100 pe tura phûtna lehkha an thehlut. Lehkha hi MPYCC vice president Laltawnliana'n a chhiar chhuah hnuah Minister hnenah a hlân a ni.

An lehkhaah hian MPYCC chuan, Lalhriat­puii chu May 27, 2022-a Excise & Narcotics department-in grape wine a zawrh lai an mansak vek tih ziakin, "Tunah pawh pek lêt a la ni lo. A eizawnna ve ber grape wine a zawrh theih tâk loh avangin a mangang em em a, chhungkaw eizawngtu ber a nih angin a rilru a hah êm avangin a nunna hial a chán hi runthlak kan tiin a ná kan ti hle a ni," an ti.

Congress ṭhalaite chuan, Lalhriatpuii chhungte hnenah July 13, Nilaini chhun dar 12 hma ngeia zangnadawmna cheng nuai 100 pe turin Mizoram sorkar an phût tih an ziak a, "In pe lo a nih chuan a ṭul angin hma kan la ang tih kan hriattir a che," an ti bawk.

Lehkha hi a copy Chief Minister leh Aizawl West-II bialtu MLA hnenah an pe tel a ni.