President thlan turah voter 4,809 Mizorama MLA-te vote hlutna 320

India President inthlan vawi 16-na, July 18, 2022-a neih tur chungchangah Mizoram Legislative Assembly secretary H Lalrinawma, presiding officer ni bawk chuan nimin khan Assembly House committee room-ah thuthar thehdarhtute a kâwm. Vote nei mi 4,809 an awm a, Mizorama MLA 40-te vote hlutna chu 320 a ni.

H Lalrinawma chuan, President thlanna turah nasa takin inbuatsaih a nih thu sawiin, "Covid-19 a darh leh mek avangin fimkhurna tur chi hrang hrangah hmalak a ni a, MLA zingah Covid-19 positive an awm palh a nih chuan Election Commission of India inkaihhruaina angin last hour-ah vote an thlak theih nan ruahmanna siam a ni dawn. ECI chuan voter-te'n kim taka vote an thlak a duh," a ti.

Assembly Secretary tarlan danin, MP-te chu Parliament House-ah vote thlak tura ngaih niin, MLA-te chu an state Assembly House-ah vote an thlâk tura ngaih a ni a; ṭul bikah Delhi leh state dang headquarters-ah vote thlâk phalsak theih a ni.

Vote thlak turte leh inthlana duty turte chu vote thlakna hmuna an luh hmain swab sample endik vek tur a ni a; ballot paper hmangin vote thlâk a ni ang.

President thlanna tura pawimawh
1) President thlang turin vote nei mi 4,809 an awm; MLA 4,033, Lok Sabha MP 543 leh Rajya Sabha MP 233 an ni.
2) MLA pakhat vote hlutna chu pariat (8) a ni a, MP pakhat vote hlutna chu 700 a ni.
3) Vote awm zawng zawng 4,809 hlutna chu 10,86,431 a ni.
4) Mizoram MLA 40-te vote hlutna chu 320 (40X8) a ni.
5) July 18, 2022 chawhma dar 10 leh tlai dar 5 inkarah vote thlak a ni ang.
6) July 21, 2022-ah Parliament House, New Delhi-ah vote chhiar a ni ang.