Vawiinah city bus an tlân ṭan dawn

Aizawl City Bus Owner Assiciation (ACBOA) chuan thuchhuah siamin, sorkarin inkhàrkhip a thlahdulnaah Aizawl city bus-te chu tlân (service) thei tura tih a nih avang­in vawiin Thawhṭanni aṭang hian sorkarin intlân chhâwk dan tur rua­hmanna a siam angin, registration number kawp kim leh kawp kim lote an intlàn chhâwk ṭan dawn tih an tarlang.

ACBOA chuan, Co­vid-19 hripui vanga state danga Mizo tangkhang lo hawte chu city bus-te'n Bairabi rél chawlhhmun aṭanga an district headquarters thlengin May 14, 2020 aṭanga June 1 inkar chhungin an phur a, phurh chhuah rûnpui ṭum ruk neih a nih thu an sawi.

Tangkhangte phurhnaah driver leh conductor-te theihtawpin an inveng fimkhur tih sawiin ACBOA chuan, driver cabin chu passenger-te luh theih loha pin a nih thu an sawi a, "Tangkhangte bungrua load leh unloading an khawihpui lo. Passenger an dah hnuah R Dengṭhuama Hall-ah inhriattir zelin, bus chhung leh páwn lam disinfectant hmanga sil zel a ni," an ti.

ACBOA tarlan danin, city bus driver leh conductor-te chu tangkhang hawte an phurh zawh apiangin rapid antibody test (RAT) tihsak zel a ni a; June 17 khan tangkhang phurtu driver leh conductor zawng zawng (mi 205) chu RT-PCR hmanga endik vek an ni a, an vaiin Covid-19 an kai lo tih finfiah a ni.

City bus driver leh conductor-te chu tangkhangte phurtu an nih avanga thinhrikna veng ṭhenkhatah a awm tih sawiin ACBOA chuan, "An in luahna thlenga harsatna tâwk an awm avangin pawi kan ti tak zet a, Mizo kan nihna leh ringtu kan nihna nen a inpersan hlein kan hria," an ti. Hetih lai hian, sor­kar hotu te, Aizawl DC leh Kolasib DC-te nen thawhhona ṭha tak an neih avanga an lawm thu an sawi bawk.