Hripui laka invênna kengkawh turin ti ; Aizawl DC-in CYMA puihna a ngen

Disaster Management & Rehabilitation Secre­tary chuan July 11, Thawhṭanni khan district commissioner (DC)-te hnenah lehkha thawnin, Covid-19 a hluar leh avangin khauh taka Covid laka invenna leh nunphung dik kengkawh turin a hriattir.

July 11 vêk khan Aizawl DC Dr Lalhriat­zuali Ralte chuan Central YMA President hnenah lehkha thawnin, Covid-19 laka himna atana pawimawhte YMA information centre-a puansak turin a ngen.

CYMA President lehkha a thawnah Aizawl DC chuan, Covid-19 vei an pun leh avangin hripui danchah a nih theih nan District Task Force on Covid-19 chuan mipuite'n nunphung dik ṭha zawka an zawm theih nan hmalak an rel thu a tarlang a, "Kan district veng/khuaah ṭha zawka zawm a nih theih nan a tam thei ang bera public awareness system hmanga puangzar turin YMA branch-te hnenah lo hriattir turin ka ngen a che," a ti.

DC-IN PUAN TURA A DUH ṬHENKHAT
1) Sorkar SoP hman mek angin, loh theih loh thilah lo chuan páwn chhuah leh inlènpawh loh tur. Intlawhpawh tam loh hi hripui léng danchah nan a him ber.
2) Páwna chhuak turte'n hmui/hmai an tuam ngei tur a ni a, inbiak lai leh awm khawm a ṭulna hmunah mask ṭha taka vuah tur a ni.
3) A khát tâwkin fai taka kut sil tur a ni.
4) Biak-in, inneih inkhawmna, mitthi vuina, infiamna leh mipui punkhawmna hmun dangah, a bik takin zaiho leh mi zinga thusawiin hmui-hmai ṭha taka tuam tur.
5) Mipui punkhawmna hmun, sakhaw biakna hmun leh puipunna dangahte inhlata awm tur.
6) Covid-19 symptom neite chu biak-inah leh puipunnaah te, sikul leh office-ahte kal loh tur a ni.