KHAWTHLIR

Nawrchizuarte chungchang sawiho
Social Welfare minister Dr K Beichhua pisaah nimin khan sorkar hotute'n Supreme Court thupek anga dan hnuaia nawhchizuar (sex worker)-te humhimna leh chhawmdawlna tur an sawiho. Nawhchizuarte chu mi dangte nen dikna leh chanvo angkhat nei an nih avangin police humhimna hnuaiah an dikna leh chanvote zahsak leh humhimsak an nih theihna tur sawiho a ni. Man emaw, an awmna hmun dap emaw, chhan chhuah emaw an nihin an hmel leh nihna tihlan khap a nih thu tarlan a ni.

Health clinic hawng
Assembly deputy speaker Lalrinawma chuan nimin khan Vanchengte khuaah Health Clinic leh MHIP In thar a hawng. Lalrinawma chuan zirna, hriselna leh eizawnnate chu mipuite'n an mamawh dan inang lo mah se, an pawimawh dan erawh a inang vek tih sawiin, "Vawiina kan hawn tak health clinic pawh hi Vanchengte in kan mamawh em em thil a ni," a ti.

Handloom Expo
Khawzawl district bawrhsap CC Lalchhuangkima chuan nimin khan Khawzawl Vengthar YMA Hall-ah State Handloom Expo 2022 a hawng. Expo thupui chu, 'My Handloom, My Pride' tih a ni a; dawr 30 siam niin, July 15, 2022 thleng a awh ang. Expo hi Ministry of Textiles hnuaia Development Commissioner for Handlooms leh Mizoram Handloom and Handicrafts Development Corporation Limited (ZOHANDCO) buatsaih a ni.

Focus discussion
UDPA department chuan nimin khan Aizawl khawpuia Sustainable Urban Transport neih tur atan ni thum awh tur Focus Group Discussion an buatsaih ṭan a, UDPA joint director HVL Zarzoenga'n a hawng. Discussion-ah hian tlawmngai pawl, lirthei hmanga eizawng pawl leh local council-te Aizawla mipui leh lirthei chêt vel dan sawiho a ni ang.