MYC sensoa IAS coaching kal turte'n thutiam an ziak

Mizoram Youth Commission ( MYC)in Super IAS 40 programe hnuaia full sponsorship-a Delhi-a IAS coaching kal tur a thlante chuan nimin khan MYC chairman Dr Vanlalṭanpuia, MLA kaihhruaina hnuaiah thutiam (agreement bond) an ziak.

Ageement bond-ah hian coaching kal turte'n hming an ziah vek bakah, an nu/pate leh MYC hotute'n hming an ziak a ni.

Agreement bond ang chuan, MYC sensoa coaching kalte chuan ṭum thum tal UPSC exam an hmachhawn tur a ni a, kum hnih chhung chu UPSC exam tih loh chu exam dang hmachhawn phal a ni lo. Chumi tur chuan coaching kal turte chuan thutiam an ziak a ni. A kum thumnaah erawh chuan UPSC exam bakah, exam dang an hmachhawn phalsak a ni thung.

IAS coaching kal turte chu MYC chuan kal lam leh haw lam bakah, coaching fee, awmna senso (PG/hostel fee) leh ṭul dangte a tumsak dawn a ni.