Champhai DEC-in sikul pakua an enfiah

Champhai District Education Committee (DEC) chuan nimin khan district bawrhsap James Lalrinchhana kaihhruaiin Champhai khawpuia sikul pakua an tlawh a, sikula thawktu leh zirlai neih dante leh zirna kalpui dante an enfiah.

James Lalrinchhana chuan, DEC ṭhukhawmin district chhunga zirna tihhmasawnna tura pawimawh hrang hrang a rel zingah sikulte dinhmun zirchian nise a tih, tihhlawhtlin nana sikul endik bulṭan a ni chu lawmawm a tih thu sawiin, "Inhauhna leh inzilhna lam ai mahin, hamsawnna tur kawngah hmabak enge kan neih tih leh insiamṭhat ngaihnate enfiaha zir ho tura sikul tlawh kual kan ni. Zirchianna aṭanga hmuhchhuahte DEC ṭhutkhawm leh huna pharha, a ṭul anga hmalak dan tur relho leh tum a ni," a ti.

Zirna chu hmasawnna zawng zawng innghahna a nih thu sawiin Champhai DC chuan, "Department hrang hrang thawhhona avanga ṭha taka kalpui theih chauh a ni. Sorkar sikulte zirna-in ṭha, mi puitling tak takte chherchhuaktu an lo ni tawh ṭhin," a ti a, zirtirtute chu nakin lawka ram leh hnam innghahna tur zirlaite enkawltu an nih avangin zirlaite nunphung chîk fo ṭhin turin a chah a; zirlaite chu ngaihsan tur dik takte ngaisang a, lehkha chhiar uar thar tur leh ruihhlo laka inthiar fihlim fo turin a chah bawk.

DEC member-te hi team thumah inṭhenin Champhai khawpui chhunga zirna in pakuate an endik a ni.

Monitoring format, zirchianna leh tehfung hrang hrang duan zulzuiin endikna an nei a; hengte hmang hian sikul chungchang kimchang, thawktu leh zirlai neih dan, SMC/SMDC leh hmasawnna ruhrel leh bungrua; school building, compound, classroom, toilet, tui leh eng, library, computer, kut silfaina leh choka leh adang neih dante an enfiah.