Thla 2 chhung lei lai lo turin hrilh

Serchhip District Monitoring Committee on Implementation of JICA on NH-54 member-te chuan nimin khan Serchhip district-a NH-54 zauh hna thawh meka Bhartia Infra Project Limited-te leivûng paih dan an endik. Leivûng paihna hmun khat liam tawh siamṭhat nana retaining wall siam tura tihte chu thla hnih chhunga thawk zo tur leh chumi chhung chuan lei lai tawh rih lo turin an hriattir.

District Monitoring Committee on NH-54 chuan, NHIDCL leh an hnuaia contractor hotute nen an inkawmnaah, leivûng paihna hmun tura thlanah chauh leivûng paih ngei ṭhin turin an hrilh bawk.

Contractor-te chuan, ruahtui tlâk tam laia gabion retaining wall siam chu a harsa deuha an rin thu te, hna chu chawlhsan thiang a nih loh avangin tun hnuah chuan environment nasa lehzuala veng chungin hnathawh an tum tur thu te, hmalakna tur an kawhhmuh apiangte ṭha taka lo bawhzui an tum tur thute an sawi a ni.

Enfiahnaah hian Lalzikpuii, SDO (Sadar) hoin Thenzawl DFO Lalbiakchama Chawngthu, Mizoram Pollution Control Board aiawh, IPR aiawh, YMA Sub-Headquarters aiawh, NHIDCL aiawhte leh contractor hote an tel.