Larsapin NABARD din champha a hmanpui

National Bank for Agriculture and Rural Development (NABARD), Mizoram Regional Office chuan nimin khan Mizoram Rural Bank auditorium-ah an din champha vawi 41-na an lawm a, Governor Hari Babu Kambhampati-a'n a hmanpui.

Governor chuan, NABARD-in kum 40 hmel a hmu leh India rama thingtlang mite tihhmasawn hna an thawk chu a lawmpui thu a sawi a, "NABARD-in Mizoram sorkar hmalakna atan nasa takin sum hmangin hna a thawk mek zel. Tunah hian cheng vbc. 1,900 lai Mizorama thingtlang tihhmasawn hna, loneitute ṭanpuina atan leh Mizorama mipui dàwr nasat deuh bank ṭhenkhatte ṭanpuina atan sum a theh chhuak tawh a ni," a ti.

Rural Infrastructure Development Fund (RIDF) - thingtlanga hmasawnna ruhrel siamna tura ṭanpuina sum kaltlangin Mizoram tan NABARD-in sum tam tak a theh chhuak tih sawiin Larsap chuan, "Heng sum hmanga hmalaknate hi duh anga chakin kalpui a la ni lo a, ṭan lak nasat a ngai hle," a ti a; NABARD aṭanga ṭanpuina sum hmuhte chu sum hnár dang an hmuhte aia a hlut zawkzia hriat a pawimawh niin a sawi.

Khualzahawm minister Dr R Lalthangliana pawhin thu sawiin, NABARD chu kum 40 chhunga India rama thingtlang mite tihhmasawnna leh loneitute chawikanna kawngah bul ṭantu pawimawh tak a nih thu a sawi a ni.

NABARD din champha lawmnaah hian Governor hian Mizorama NABARD hmalakna tarlanna lehkhabu, 'Snapshot of NABARD’s Initiatives in Mizoram' tih a tlangzarh a; Mizoram Coperative Apex bank hnenah micro ATM a hlan a, Primary Agricultural Credit Societies hnenah mobile van chahbi leh MRB hnuaia hma latu JLGs hnenah cheque a hlàn bawk.