Kum chanve chhungin Aizawl dist-ah Police-in thubuai 1,294 an ziak lut

Kumin kum chanve, January-June thla chhungin Aizawl district-a police station hrang hrangah thubuai 1,294 ziah luh a ni a, nikum kum chanve chhunga thubuai ziah luh zat aiin a tam zawk.

Nimin khan Aizawl SP pisa conference hall-ah Aizawl district crime review meeting neih a ni a, Aizawl SP C Lalruaia'n kaihruaiin, Aizawl District Executive Force hnuaia officer-te an tel. Kum chanve chhunga police station hrang hranga thubuai ziah luhte leh a kaihhnawih thilte thlirho a ni a, vawiinah chhunzawm a ni ang.

Review meeting-a tarlan danin, January-June 2022 chhungin Aizawl district-a police station pakuaah thubuai 1,294 ziah luh a ni a, nikum kum chanve chhunga ziah luh zat 1,143 aiin thubuai 151-in a tam zawk.

Kumin kum chanve chhunga thubuai ziah luh 1,294 zinga 919 (71.02%) chu rûkrûk thubuai a ni a; kum 2021 chhunga thubuai ziah luh 1,143 zinga 630 (55.12%) pawh rûkrûk thubuai a ni bawk.

Thubuai ziak luh 1,294 zinga 362 chu chhui zo tawhin, charge sheet an thehlut tawh a, thubuai 88 erawh chu tihtawp a ni. Thubuai 844 chu police-in an la buaipui mek thung.