END minister Beichhua báng turin phût

Congress party chuan thuchhuah siamin, Excise & Narcotics department (END)-in May 27, 2022-a Millennium Centre (MC)-a grape wine an man kal zelah grape wine zuartu zinga mi Lalhriatpuii, Dawrpui Vengthar a thi niin an tarlang a; END minister Dr K Beichhua chu mawhphurhna laa minister aṭanga báng turin an phût.

May 27, 2022-a MC-a grape wine man zingah Lalhriatpuii zawrh lai cheng nuai 22 vel hu a tel tih sawiin Congress party chuan, Lalhriatpuii'n mangang tak chunga sumdawnna dang neih a tum mek laia a thi chu pawi an tih thu an tarlang a, "Winery-a wine siam chhuahte man si lo a, sum tam tak sénga zuartute ta man a ni hi a pawi a, kan hrethiam thei lo a ni," an ti.

Congress party chuan, June 3, 2022-a END minister Dr K Beichhua'n END mite chu grape wine man tura kal an nih loh thu a sawi lai a, grape wine zuartute chu Rs 3,000 ṭheuh an chawitir si chu mak an tih thu an sawi a, "Zu mansak tel anga dâwta an puhnate phei chu hriatthiam theihah kan ngai lo," an ti a; March 25, 2022-a Council of Minister ṭhukhawmin MLP Draft Rules, 2022 pawm tawh mah se, government gazetted-ah chhuah a la nih loh avangin hman theih a la ni lo tih an sawi.

MLP Rules hman tur a la awm loh lai leh dan tlawhchhan tur mumal nei si loa grape wine zawrhte man a ni chu thuneihna hman sualna a nih thu sawiin Congress chuan, "Mi harsa zawkte chunga thuneihna an hmang sual hi a dik lo a, chumi avanga thihna hial a thleng hi pawi kan ti a, Excise minister Dr K Beichhua hi moral responsibility laa báng turin kan phût tlat a ni," an ti.

Congress party chuan, MLA Dr ZR Thiamsanga'n grape wine siamtute tana hmalak zel a intiam laia tun thlenga grape wine mante pêk kîr a la ni lo chu an ngaih thutak thu sawiin, "Grape wine an man sakte hnenah a rang lama pe kîr turin Dr K Beichhua leh Dr ZR Thiamsanga te kan phût. Grape wine an mansak vanga rilru hahna nasa tak tuara boral ta Pi Lalhriatpuii chhungte leh grape wine an mansakte hnena zangnadawmna pe ngei turin Mizoram sorkar kan phût a ni," an ti.

Grape wine chungchangah a dinna tichiang vat turin Mizoram sorkar an phût bawk.