April 12, 2022 hnua active case tam lai ber

July 11, Thawhṭanni khan Mizoramah Covid-19 vei mi 120 hmuh chhuah a ni a, nimin zing khan hripui vei enkawl lai mi 741 awmin, kumin April 12 hnua active case tam lai ber a ni. Nimin khan hripui vei dam tawh mi 12 chhuahtir an ni a, Covid-19 vanga thi an awm lo.

Thawhṭannia Covid-19 positive hmuh thar mi 120-te chu mipa 56 leh hmeichhia 64 an ni a, Rapid Antigen Test hmanga hmuh chhuah vek niin, positivity rate 21.94% a ni. Endikna dang hmangin swab sample endik a ni lo.

IDSP record angin, Mizoramah Covid-19 vei 2,29,982 hmuh chhuah a ni tawh a, mipa 1,07,050 leh hmeichhia 1,22,932 an ni a, mipa aiin hmeichhia 15,882-in an tam zawk. Nimin tlai dar 5 thleng khan mi 2,28,547 (99.38%) chhuahtir an ni tawh a, mi 706 (0.31%) thi tawhin, enkawl mek mi 729 (0.31%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna Lawngtlai district chiah a awm tawh a; active case tamna ber Aizawl district-ah mi 388 an awm tling tawh a, Lunglei district-ah 156 an awm bawk.