Sumdawnaah chîmrala kan awm loh nan Mipui ṭanrual a pawimawh - Lalsawta

Finance minister Lalsawta chuan, sumdawnna kawngah hnam dang laka Mizote chîmrala an awm lohna atan mipui an ṭanrual a pawimawh thu a sawi.

Kolasib-a District Trea­sury Office leh Assistant Commissioner of Taxes Office building nimina a hawnnaah thu sawiin Lalsawta chuan, "Sumdawngte hian thil leitute'n thil an lei rualin VAT an pe tel nghal a, sorkara pek luh tur an lo kawl hawh a ni tih hria a, kawl rei loa pek thuai ṭhin tur a ni. Hetih rual hian, sumdawnna chungchangah chîmral kan nih loh nan mipui kan ṭanrual a ngai," a ti.

Finance Minister chuan, mipuite chu chhiah pe hreh lo tura chahin, "Chhiah pek hi hmasawnna hriltu pawimawh tak a ni," a ti a; July 1, 2017-ah Goods & Services Tax hman ṭan tur a nih avangin, a hun taka hman ṭan a nih theih nan hmalak mek zel a nih thu a sawi.

NEDP chungchang sawiin Finance Minister chuan, "Mahni eikhawp tharchhuah duhtawk mai lo a, hlâwkpui thama hna thawh leh thar tam chu thupui bera dah a ni. Hemi atan hian khawl, cold storage leh hmanrua leh hmunhma ṭha NEDP hnuaiah siam zel a ni dawn," a ti a; sorkar hnathawkte chu kut hnathawktute kaihruai ṭha tur leh an kalna apianga mipuite fuih phûr zel turin a sáwm.

Inkhawm hi Finance secretary Lalmalsawma, chief secretary-in a kaihruai a, PWD executive engineer Lalthanzuala'n in sak dan a sawi.

Assistant Commissioner of Taxes Office building hi cheng 281 sênga a sak a ni a, July 29, 2014-ah sa ṭanin, July 19, 2016-ah sak zawh a ni. In hi chhâwng thum a sak a ni a, office rest house leh officer quarters pahnih a awm tel.

District Treasury Office building chu cheng nuai 137 sênga sak a ni a, February 12, 2015-a sa ṭanin, June 23, 2016-ah sak zawh a ni.