International Nurses Day - Nurses Week

Vawiin May 12 hi Inter­national Nurses Day a ni a, Mizoramah pawh hman a nih dawn bakah, Nurses Day denchhen hian tun kar chhungin Nurses Week hman mek a ni.

International Nurse Day pualin Mizorama nurse-te chuan May 8, Thawhṭanni aṭang khan Nurses Week an hmang a, an la hmang mek zel. Nurse Week hi nurse pawl hrang hrangte leh damdawi-in hrang hranga nurse-te chuan vantlang tana rawngbawlna hun atan an hmang a; home hrang hrangah thilpek an hlan a, mipui tan damdawi lam kaihhnawih chi hrang hrang a thlawnin an tihsak.

Aizawl Civil Hospi­tal nurse-te chuan nimin khan Secretariat Com­plex-a DPAR leh Finance Secretariat-ah a thlawna blood pressure leh blood sugar endikna hun an hmang a, nurse 14 an thawk chhuak. Mi 250-te BP an enfiahna aṭangin BP sang mi pasarih an hmu chhuak a; blood sugar test mi 200 aṭangin blood sugar sang tih inhre lo mi paruk an hmu chhuak bawk.

Nurses Week pual hian Health Workers Training School chuan nimin khan Aizawl Civil Hospital tan thisen pein, mipa 23 leh hmeichhia 12 ten unit 35 an pe a; Mission Foundation Movement (MFM), Bawngkawna health worker zirlaite'n Synod Hospital tan thisen unit 4 an pe bawk a ni.

Mizorama nurse-te hi Mizoram Nursing Council (MNC) hnuaiah an inziak lut vek a, MNC hi nurse chungchanga thuneitu niin, an hnena inziak lut lote chu pawm an ni lo. MNC din tur hian Mizoram Assembly chuan kum 1990-ah dan a pass a, kum 1991-ah MNC chu din a ni.

Mizoram Nursing Council registrar Zo­chuan­puii'n Vanglaini palai zawhna chhanga a sawi danin, MNC-ah hian tun thlengin mi 4,700 vel an inziak lut tawh a; chu'ng zingah chuan Mizo nurse-te chauh ni lo, RIPANS-a nurse zir chhuak hnam dangte leh health worker zir chhuakte pawh an tel.

MNC-a inziak lut nurse zingah thi tawh eng emaw zat an awm a, tunah hian la service mek nurse leh health worker 3,000 vel an awm a ni.

Trained Nurses Asso­ciation of Mizoram (TNAI) president Lal­rem­mawii chuan, tun dinhmunah Mizo nurse thawk mek mi 1,300 vel awma an ngaih thu Vanglaini a hrilh a; Mizo nurse-te chu Mizoram chhung bakah, India rama khawpui liana damdawi-in hrang hrangte leh sipai lamahte an thawk tih a sawi. USA, ENgland, Ireland, Australia, Singa­pore leh Asia chhimchhak lam rang danga thawk mek eng emaw zat an awm thu a sawi bawk.

International Nurses Day hi khawvela nurse ropui bera ngaih, Florence Nightingale-i pian ni, May 12-ah kum 1965 aṭangin kum tin hman ṭhin a ni.

Nurses Day-ah hian khawvel puma hman turin thupui an nei ṭhin a; kumina thupui chu - 'Nurses: A voice to lead - Achieving the sustainable development goals' tih a ni. Nurses Day hi TNAI huaihawtin vawiinah Aizawl Civil Hospital conference hall-ah hman a ni dawn a, district dangahte pawh hman a ni ang.