Zampui Mizote'n kawng an zawh

Jampui Mizo Convention (JMC) chuan nimin khan Zampui tlangdunga Mizote'n Behliang­chhip aṭanga Vanghmun thleng kawng an zawh a, mi ṭhahnem tak an tel. JMC hian Jampui Mizo Autonomous Region (Regional Council) tihpuitlin an phût a ni.

Kawngzawh hi JMC president Lalramzauha Sailo-in a kaihruai a, Zampui tlangdunga khaw hrang hrang aṭangin mi ṭha­hnem tak an tel. Behliang­chhip aṭanga zawh ṭanin, Vang­hmun thleng an kal a; Vanghmun BDO office-ah Tripura chief minister Manik Sarkar hnenah thlen tur an thil phûtte ziahna lehkha an thehlut a ni.

JMC hian thil phût chi hrang hrang an nei a; an phût zinga an ngaih pawimawh ber chu - Zampui tlanga Mizote hnam anga an dam khawchhuah theih nana an beisei ber, Jampui Mizo Autonomous Region (Regional Council) chu point hmasa bera daha tihpuitlin a ni.

JMC thil phût dangte
# Tripura sorkara 'Lushai' tih chu 'Mizo' tia thlak
# Teacher Eligibility Test (TET) alternative language syllabus-ah Mizo subject telh.
# Tripura (central) University-ah Mizo subject telh.
# Zampui tlangdunga Revenue ramrite teh ṭhat a, traditional boundary anga kaltir.
# Forest Right Act hnuaia Zampui tlangdunga ramte chinfel.
# Hmunpui khua ADC village pahniha ṭhen.
# Khuarel chhiatna tuartu, serthlum enkawltute hnena zangnadawmna pek.
# Agartala Doordarshan TV-ah Mizo programme minute 15 tal siamsak.
# NH-44B, Kanchanpur-Chhimluang via Zampui Hill kawngpuikum 18 kal taa siam ṭan tawh, tuna km. 10 chauh la siam chu siam zawh.