Pawl 12 pass tharte lawmpui

Zirlai pawlte leh political party ṭhenkhat chuan Mizoram Board of School Education (MBSE)-in nimina Higher Secondary School Leaving Certificate (HSSLC) Examination 2017 result a tih­chhuah taka pass tharte an lawmpui thu an tarlang.

MZP chuan, MBSE-in HSSLE 2017 result felfai leh changtlung taka an tichhuak chu lawmawm an tih thu sawiin, MBSE-a thawkte chungah lawm­thu an sawi a, "Zirlai hlawhtlingte MZP chuan a chhuang a, an hlawh­tlinnaah thinlung takin a lawmpui a, an kal lehzelna tura duhsakna sang ber a hlan. Zirlai la hlawhtling ve rih lote pawh beidawng loa a lehpekah hlawh­tlinna chang ngei tura bei turin a ngen a ni," an ti.

MZP chuan, Arts, Science, Commerce leh Vocational-ahte Mizo zirlaite'n pakhatna dinhmun an luah chu lawm­awm an tih thu an tarlang a; zirlaite chu ṭan la zual zel turin an chah.

Mizo Students Union chuan, kumin HSSLC pass percentage pawh duhthusam ni lo mah se, exam beitu 74.86% an pass chu lawmawm an tih thu an tarlang a, "Hlawh­tlinna chang zawng zawngte kan lawmpui a, hlawhtling zo ve ta lote pawh kan tawrhpui a, beidawng loa hlawhtlinna chang ngei tura ṭan la turin kan ngen a ni," an ti. Result chhuakah fel lo leh dik lo a awm loh ngei an beisei thu an tarlang bawk.

MNF ṭhalai pawhin thuchhuah siamin, HSSLC pass tharte thinlung taka an lawmpui thu an tarlang a, "Zirlaite an kal leh zelna turah duhsakna sangber kan hlan. Chhuak zo ve ta lote kan tawrhpui a, beidawng loa tumruhna nasa lehzual nena hma lam pan turin duhsakna kan hlan a ni," an ti.

Hetih lai hian MNYF chuan, sorkarin world class education a sawi nasat em em laia kumina pass percentage 74.86%-in kum 2016-a pass percentage 76.08% a phâk lo chu world class education a la hlatzia tichiangtua an ngaih thu an sawi.