Kum nga chhungin Mizoramah In 493 leh ram hmun 686-ah a kâng
Fire & Emergency Services chhinchhiah danin, kum nga chhung, kum 2012 - 2016 inkar khan Mizoramah in 493 a kang a, hmun 686-ah ram kâng a awm.
Kum nga chhung hian kum 2012-ah in kâng a tam ber a, in 162 a kâng; hemi kum vek hian ram kâng 114 a awm a, in kâng leh ram kâng vanga thi mi pakua leh hliam mi 16 an awm. Bungraw kâng ral hlut zawng chu Rs. 18,60,68,350 a ni.
Ram kang tam ber kum chu 2014 kha niin, ram kâng 190 a awm. In kâng leh ram kang hi kum 2016-ah a tlem ber thung a; in kâng 35 leh ram kâng 69 a awm a, mitthi pahnih thiin, mi pakhat a hliam a ni.
Kum 2012-16 chhung khan kângmei chhuak vanga thi mi 27 leh hliam mi 42 an awm a, bungraw kâng ral hlut zawng chu Rs. 33,69,04,024 a ni a; bungrua chhanhim hlut zawng chu Rs. 75,72,12,994 a ni thung.
February 2012 kha in kâng a tam ber thla a ni a, in 76 a kâng. March 2013-ah ram kâng a tam ber a, hmun 113-ah ram a kâng a ni.
Kumin bikah, January-March inkarah in 21 a kâng tawh a, hmun 42-ah ram a kâng. Bungraw kâng ral hlut zawng chu Rs. 23,91,500 a ni a, bungrua chhanhim hlut zawng chu Rs. 12,32,500 a ni thung.