CADC MDC 7-te bànna la pawm lo

Chakma Autonomous District Council (CADC)-a executive member pali leh nihna pawimawh tak tak chelhtu MDC dang pathumin an nihna aṭanga an bânna, chief executive member Kalikumar Tongchongya hnena April 26, 2017-a an thehluh chu nimin thleng khan pawm a la ni lo.

Thu dawn danin, CADC EM pali leh MDC pathumte'n an nihna aṭanga bànna an thehluh chungchangah hian CEM Kalikumar Tongchongya chuan chief minister leh MPCC president Lal Thanhawla hmuin thil awm dan a sawipui tawh a; thil thleng mek chingfel turin MPCC hruaitu dangte pawh a kâwm a ni.

EM pali leh MDC dang pathumte hian Congress party leh MDC aṭanga bâng loin, an nihna (post) chelh aṭanga banna an thehlut a; anni hian CEM thlak an duh nia sawi a ni. An duh dante chu MPCC vice president, R Lalzirliana, treasurer H Liansailova leh general secretary (i/c District Council Affairs) C Chawngkunga te pawh an kawm tawh.

CADC EM zinga bânna thehluttute chu Taxation changtu Amit Kumar Chakma, Primary School Education changtu Amar Smriti, Road Transport changtu Chitra Kumar Chakma leh Environment & Forests changtu Susen Chakma te an ni a; MDC dang pathumte chu - Town Planning chairman Mohan Chakma, Primary School Education Board president Sushil Kumar Chakma leh deputy chief whip Ajoy Kumar Chakma te an ni.

CADC-ah hian elected member 20 awmin, chu'ng zinga 17 chu Congress party mi an ni a, independent MDC pakhatin a thlawp. MDC dang pahnih chu BJP leh MNF party mi an ni a; nominated member pali, Congress party mi vek an awm bawk.