KHAWTHLIR

Outreach camp
Serchhip District Health Society ruahmannain Serchhip chief medical officer Dr Laldawnglian­a Sailo leh doctor eng emaw zatin East Lung­darah nimin khan Reproductive Child Health (RCH) Outreach Camp an buatsaih. He hunah hian nu insiam duhte an insiamtir a, natna hrang hrang neite tan inentirna hun an hawng bawk. Inentir tur hian mi 500 chuangin hming an ziak a ni.

NEDP sawipui
Finance minister Lalsawta chuan nimin khan Kolasib district chhunga sorkar department hotute chu IPR conference hall-ah a kâwm a; NEDP hnuaia Kolasib district chhunga hmalakna leh hnathawh zel dan tur a sawipui.

Heroin man
Champhaia Excise & Narcotics department-te chuan May 10, Nilaini tlai dar 3:30 khan Champhai Electric Vengah heroin gram 15 leh a neitua puh Lalengmawii (33) d/o Lalawia (L), Champhai Electric Veng nia inchhál an man. Lalengmawii hi NDPS Act, 1985 tlawhchhanin thubuai siamsak niin, Champhai District & Sessions Court-ah thawn nghal a ni.

Kawng siam
Champhai Tlangsama taxi neitute leh khalhtute chuan tun hnai khan Tlangsam leh Champhai inkar kawng an siam ṭha. Kawng siamna atan Tlangsam V/C-in lung truck phur khat an tum a, kawng khuar zual laite an hnawh a ni.

AIDS campaign
JL HSS NSS unit chuan nimin khan an sikulah HIV/AIDS chungchang leh social media chung­chang inzirtirna hun an buatsaih a, Miss Mizoram Rody Vanlalhriatpuii'n hmanpuiin, thupui a sawi. He hunah hian JL HSS-a pawl 12 zirlaite an tel.

Dawrtu zat
Kum 2016-17 chhung khan Printing & Stationery department chu Mizoram sorkar hnuaia department hrang hrang 42-in an dawr a, kum 2015-2016 aiin dawrtu department an tam zawk a ni.