Lottery leh Mizo Carbon Product-a Min puhnaah kan fihlîm - CM Hawla

Chief minister Lal Thanhawla, MPCC president ni bawk chuan, MNF-te'n Mizoram state lottery leh Mizo Carbon Product chung­changa MNF-te'n an puhnaah a fihlim niin a sawi a, "A chhui turin CBI leh ACB ruai se," a ti.

Lal Thanhawla hian nimin khan Congress Bhavan-ah thu sawiin, "MNF-te'n zawhna min zawh, lottery leh Mizo Carbon Product chungchangah hetiang hian ka chhang e. Heng thil pahnihah hian Finance minister Lalsawta leh Industries minister H Rohluna nen kan eiru a, kan eirûk an finfiah theih zat zat chu an party fund-ah kan thawh ang tih ka puang e," a ti a; rinthu leh tlem belh ni lo, taknaa inbeih a ṭhat thu a sawi.

Lottery leh Mizo Carbon Product chungchang chu MNF-te'n CBI leh ACB an chhuitir duh a nih chuan a puih tur thu a sawiin Lal Thanhawla chuan, "Direct-a min hmu hreh a nih pawhin, mi dang ruaiin rawn sawi se, hma ka lo la vat ang," a ti.

Mizoram tan Congress an sorkar a pawimawh nia sawiin MPCC President chuan, "Congress sorkar loh pawizia chu MNF kum 10 an sorkar chhung khan a lang chiang. Mizoram an tichhe lailet dêr a ni," a ti. MNF hruaitute chu takna leh dikna nen an kal lo nia sawiin, "An hruaitute hian MNF hi takna leh dikna nen an hruai theih hun khawvela thil siam tinréngin nghakhlel takin an thlir reng a ni," a ti bawk.

MPCC President chuan, Mizo­ram chhim lam aṭangin MLA inthlana tlin leh tlin loh tur rawn lang ṭhin nia sawiin, "Tun ṭumah pawh chutiang chuan nakkum inthlan atan meichher a rawn êng phei leh ta a ni," a ti a; MADC in­thlan chu MNF President-in nak­kum MLA inthlanna darthlalang tur nia a sawi tawh thu a tarlang.

Sorkarin Peace Accord Review Committee a din chhan sawiin CM Hawla chuan, "MNF-in an bum chhuah leh an bum haw lehte khan ngaihsak an hlawh lo a, Congress chauh hi ngaihsaktu an ni. Engtin emaw tal an damna a awm lo maw tih kan ngaihtuah a ni," a ti.

CM Lal Thanhawla chuan, Peace Accord Review Committee-ah hnam pasalṭhate pawh telh an nih thu sawiin, "Hnam pasalṭhate zingah hian in leh lo nei lote an la awm. Lungawi lo an awm hian ram tan a ṭha lo a, an lungawina zawn a ngai," a ti a; hnam pasalṭhate tan sorkar laipuiah sum hai chhuah dan Committee-in a zawn tur thu a sawi.